政壇：港大請齊特首參選人
有「百年老店」之稱嘅香港大學喺嚟緊禮拜日舉行校慶晚宴，肯定好多政商界名人嚟捧場，但最矚目應該係佢哋請晒幾位特首參選人出席，包括CY梁振英、唐唐、白鴿黨鐵頭仁、民協馮檢基同未宣布參選嘅新民黨葉劉淑儀。港大嘅公關話，邀請信一年前已發出，嗰陣都唔知佢哋有意選特首，所以世事真係蹺。
港大公關話，一年前發信請「雙英」係因為佢哋分別係政務司司長及行政會議召集人，至於請鐵頭仁、馮檢基同葉劉，係因為佢哋都係港大嘅校友，真係冇諗到咁蹺有意參選特首嘅人會咁樣聚首一堂。不過，佢哋五個都未應承係咪出席，所以會唔會同場過招仲未知。
為慶祝港大百周年校慶，學生同校友傾盡全力幫手籌備。