政壇:選委界別票王多名人

選委會選舉只得二十三萬人有資格投票,名副其實係小圈子選舉,正因如此,好多選委候選人都少講政綱,一味叫人認住自己個嘜頭算數,所以選舉結果顯示好多票王票后都係社會星級知名人士。好似飲食界票王就係奪得七百幾票嘅「蘭桂坊之父」盛智文,政協票后就係「阿姐」汪明荃,相信可以為今次唔關普羅大眾事嘅選舉,製造一啲茶餘飯後嘅吹水話題。

至於批發及零售界,富貴黨副主席「莎姐」周梁淑怡就力壓十幾人,成為得票最多嘅候選人;而會計界票王就由資深會計師李家祥奪得。富貴黨榮譽主席田北俊就成為商界(一)票王;醫學界票王就由醫學會會長蔡堅奪得。至於法律界票王,就係近期捲入種票疑雲嘅港大法律系助理教授張達明,佢當選後仲講笑咁話自己啲票係種返嚟嘅。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!