政壇：發叔復仇記踢何君堯出局

今屆選委會選戰激烈，好多喺上一屆可以協調名單而自動當選嘅界別，今屆都傾唔掂數，當中包括新界鄉議局界別，喺尋日選委會投票仲上演咗一場復仇記。

策動修章累發叔三失

正如早前講過，新界鄉議局界別有二十八個議席，因為鄉紳之間存在分歧，最後就有成三十人報名參選，唔似上屆咁經協調後和諧自動當選，需要投票定勝負，當中最勢危就係取代鄉議局主席劉皇發成為屯門鄉事委員會主席嘅律師會會長何君堯。尋日朝早結果一出，何君堯真係輸咗。

喺鄉議局選委戰中，最高票係現任離島區議會主席周玉堂，有成一百零九票，可能係佢老人家德高望重。至於其他當選選委就算唔過一百票，最少都有八、九十票，例如發叔個仔劉業強就有八十九票，算係中規中矩。唯獨何君堯只得六十一票，要同得票相同嘅鄉議局顧問梁和平抽籤定輸贏，最後仲唔好彩抽輸咗，即係連個天都幫埋發叔。另一落選嘅係長洲鄉委會主席翁志明。

仲記得喺鄉委會改選一役，有人策動修章，而何君堯係支持者之一，令到發叔唔能夠以太平紳士成為當然執委，無法競逐連任，失落鄉事會主席後，亦即喪失屯門區議會當然議席，而發叔當時係出任屯門區議會主席，就因為咁變咗「三失」，都咪話唔慘情。正所謂君子報仇十年未晚，呢次唔使等十年，唔使一年就報到一箭之仇，踢咗何君堯出選委。