影視處姑息養奸 壹淫媒有恃無恐

好多人以為，對付淫賤傳媒不斷發放淫褻及不雅物品，係要先經淫審處評級，然後先至可以提出檢控。其實呢個純粹係誤會，執法部門原來有權對屢犯不改嘅傳媒採取直接檢控，而毋須先評級咁麻煩，即係話，當局完全可以先斬後奏，估唔到呢？

唔係太一叮吹水，而係當局自己踢爆o架。商務及經濟發展局最近覆函立法會，聲稱考慮到淫審處過往嘅評級，以及公眾非常關注《爽報》刊載不雅物品對青少年嘅不良影響，影視處若發現《爽報》刊載嘅內容明顯違反《淫褻及不雅物品管制條例》，並故態復萌，會考慮加強執法，直接檢控有關出版商，而唔會事先將有關物品交淫審處評級，以確保檢控行動更快捷咁話。

嗱，姑妄言之，姑妄聽之，影視處話就話擁有一把先斬後奏嘅尚方寶劍，但幾時見過用來對付淫賤傳媒呢？咁多年來，壹淫媒旗下刊物違反《淫褻及不雅物品管制條例》個案已多達百幾宗，影視處從來冇主動檢控。仲有吖，壹淫媒旗下免費報《爽報》出版未夠三個月，已有廿三項內容被評為二級不雅，成為過街老鼠，人人喊打，但影視處執法咪又係懶懶閒。所以話，當局今次聲稱會考慮加強執法，直接檢控有關出版商，大家聽吓好喇，千祈唔好盡信吖。

正如全國政協委員劉夢熊話齋，當局「權力缺鈣，執法陽痿」，對壹淫媒旗下刊物慣性輕判輕罰，好多仲係不判不罰，最近眼見社會不滿《爽報》嘅聲音日增，影視處先至話加強檢控，希望佢哋講得出做得到，唔好又係吹水喇。

「十年磨一劍，霜刃未曾試」，壹淫媒屢告屢犯，宣淫無道，正正因為當局姑息養奸，尚方寶劍藏而不用，淫賤黎有恃無恐咯喎，梗係愈淫賤愈快樂喇。

最離譜嘅係，影視處有例不依，對壹淫媒百擒百縱，但對東方報業集團就從不手軟，從回歸前至回歸後，東方無數次被當局選擇性檢控，簡直不堪其擾。最經典嘅例子莫過於Kelly Brook事件，刊登同一輯外國女星性感照，《東方日報》及《太陽報》打咗格仔仍被評為第二類物品，而爛果報就被評為第一類非不雅，喺香港有售嘅外國雜誌《NOW》無打格無封套，連送檢都慳番添。同一天空下，竟然有三重標準，問你服未！

劉夢熊分析，當局取態擺明涉及政治因素，特區政府仍停留於殖民地思維，寬待壹淫媒，卻視東方為眼中釘。冇錯嘞，今時今日，反中亂港有運行，愛國愛港冇前途，港英餘孽同淫賤黎沆瀣一氣，包庇淫媒又有乜嘢出奇吖，叮！