政壇：政商定格：戴尚蓮素食電影感動媽打
社交名人李桂蘭同囡囡Shelley戴尚蓮都係食素，Shelley比媽咪更嚴格，戒肉戒蛋還戒奶，畀人笑佢好怪，但佢卻樂做「素食大使」，仲用咗三年時間拍下紀錄片「PLANEAT」，今年初，作品大功告成，獲美國同英國各大電影節賞識，邀請佢參展，就連披頭四樂隊成員之一嘅Paul McCartney都捧場，大讚「PLANEAT」拍得有啟發性。
呢套紀錄片尋日喺香港舉行首映，Shelley姨媽李麗娟都被影片打動，媽打話由下月開始，每逢周一會食素。前「滙豐一姐」王以智都支持素食，每日三餐只有中午食肉。不過，九巴後人雷禮權就唱反調，坦言最憎食菜同生果，但每日啪十八粒維他命丸，補番數喎。
李桂蘭（左）同王以智（右）齊加入素食一族，三餐減少食肉。
戴尚蓮（左）執導嘅「PLANEAT」叫好又叫座，哥哥戴尚安（右）都唔執輸，為國家地理雜誌拍攝紀錄片。