政壇：搞搞政：阿Paul落戶港島心思思

阿Paul謝偉俊○八年喺外界不被睇好嘅情況下，當選立法會旅遊界議席，由「法律超人」變咗「旅遊超人」，令各界刮目相看。事實上，過去三年佢不時同泛民主派議員就議事規則等惹火議題唇槍舌劍，已被建制派視為自己友。

早前盛傳佢有意循九龍東出選，但據聞建制派分析選情後，認為佢落戶港島區「搶灘」更划算，除議席增加外，主要係公文袋因外傭居港權官司元氣大傷，全取兩席嘅機會大減，二來上次掹車邊當選嘅公民起動何秀蘭，亦勢必遭有意捲土重來嘅勞永樂同曾健成「拉後腳」，如果阿Paul以鮮明嘅中產專業人士出選，係有贏面。

據聞佢未有最後決定，但聽得出佢對落戶港島區「心思思」，因為佢嘅另一半白姐姐啱啱喺區選勝出，反映佢哋嘅政治取態喺中產選區有一定叫座力。相反佢喺九龍東冇人冇物，亦要慎防因區選大敗而辭任社民連主席嘅陶君行，隨時以哀兵姿態大舉反撲。阿Paul喺邊度落腳？相信好快會揭盅！