政壇：盛品儒爭選委亞姐幫拖
選委會選舉後日投票，各界別候選人各出奇謀積極拉票。尋日上午五個亞姐去到科學園，其中三個向途人派發參選資訊科技界嘅亞視執董盛品儒嘅宣傳單，反而盛品儒就冇出現。咦！涉嫌公器私用喎！
班亞姐都好識執生，話盛生要開會行唔開，又話自己係出於義務性質幫盛生拉票喎，分毫不收，仲讚盛生靚仔人緣好，自然多人幫喎。由於係義務性質，所以唔計選舉經費。
盛品儒甩底，反而另一候選人吳傑莊就現身拉票，但佢啲宣傳品嘅顏色同設計同盛品儒好相似，有兩個亞姐仲幫佢派單張添！佢笑笑口話係撞啱啫，佢哋兩個咁老友，心有靈犀唔出奇，強調自己係獨立候選人，絕對冇聯票成分喎！
