環保標準超低 安全風險高危

內地黑心產品好多時涉及重金屬超標,長期使用會損害神經系統,影響腦部發育甚至致命,對兒童危害極大。唔講唔知,原來本港小朋友亦面對同樣嘅威脅。

環保組織抽驗咗本港出售嘅一百件兒童用品樣本,兩成三含鉛及水銀等至少一種對人體有害嘅重金屬,其中六款鉛含量超出美、加標準最高達十六倍,問你怕未!

更得人驚就係,本港對兒童產品重金屬含量並冇強制規管,莫講話同發達地區比,甚至連內地都不如。現行監管條例依照三套唔同嘅國際標準,兒童產品只要符合其中一套就過骨,所謂規管形同虛設。環保組織要求當局執行更嚴格嘅標準,保障小朋友健康。

叮佢個鎯鎯!最容易受傷害嘅兒童居然得唔到法例保護,你話係咪混帳吖?小朋友好奇心重,乜都鍾意擺入口,兒童用品冇監冇管,簡直就係靠害!

係人都知,魚網愈密,捉魚愈多。安全標準亦一樣,要求愈高,保障愈大。呢啲道理小學生都明,港府偏偏詐傻扮懵,標準落後,得過且過,豈有此理!

講開標準落後,唔止兒童用品,連嬰兒食品規管亦一樣咁寬鬆。就講近排令唔少父母聞之色變嘅日本輻射污染奶粉吖,本港食品嘅「銫」含量標準,居然比日本寬鬆四倍。港府成日話日本食品合格,可以放心食用,唔止自欺欺人,直頭係攞港人生命健康嚟開玩笑,叮!

除咗兒童用品規管寬鬆,連人人都要呼吸嘅空氣質素,當局一樣唔負責任。好似空氣污染物微細懸浮粒子(PM2.5),香港嘅標準係全年平均每立方米三十五微克,而國際標準係十點三微克,差天共地,唔怪得香港空氣質素愈來愈惡劣喇。

當局唔止標準低一大橛,而且連規管時間表都冇,根本冇心改善空氣質素。呢嗱,本港舊年嘅PM2.5數據喺全球城市排名尾八,含量比排榜首嘅加拿大白馬市超出二十倍有多,甚至連菲律賓馬尼拉都不如。尋日有一班港大醫科生着上保護衣,戴埋防毒面具喺立法會外瞓街,促請更新不合時宜嘅空氣質素指標,市民心聲當局聽到未呀?

環保標準超低,安全風險高危。太一叮想問吓班高官,三流檢測標準,九流空氣質素,監管水平大落後,香港舢舨充炮艇,點做一流國際都市吖,叮!

「Money18免費即秒股票報價網站」現推出8升級功能,財經資訊,實時實發!