政壇：金勞詹押注老友公司
人稱「金牌莊家」同「金勞詹」嘅詹培忠喺股票市場靜咗一排，終於又出手，押注嘅係佢多年老友余維強嘅創業板公司瑞豐石化（前稱博軟）。金勞詹話係間公司近排配股，睇到個價靚，又望間公司可以「有啲嘢搞吓」，所以落疊認購咗，仲「浮埋面」，要喺聯交所嘅權益披露中「露面」。
不過，金勞詹就話佢嘅身份係純粹投資者，唔會入董事局喎！咁佢批貨會坐幾耐？佢笑笑口話「中線啦」，主要睇公司嘅表現。
瑞豐上禮拜五宣布先舊後新配股2.32億股，每股0.25元，當日有成一成九折讓，淨集資5,640萬元做營運資金。而聯交所資料尋日就披露咗，金勞詹當日買咗1.9億股，咁即係差唔多近八成二由佢一手買起，認真豪氣。不過，圍起都係4,750萬元，對於成日過拉斯維加斯閒閒地執幾千萬嘅佢嚟講，真係濕濕碎。