政壇：搞搞政：官員拆彈靠黃金個半鐘

喺立法會舊大樓開禮拜三大會期間，好多高官都趁住議員雲集嘅機會，到前廳同議員吹水或游說議員支持政府政策等，但搬咗去到添馬艦新大樓後，唔開會嘅議員多數返樓上辦公室開工，咁就令班高官好閉翳，皆因好難向議員拉票。不過，你有張良計，我有過牆梯，原來高官已經諗到計。

話說尋日大會開始冇耐，商務及經濟發展局常秘黃灝玄突然現身前廳，同議員談笑風生，令人好好奇。一度同黃灝玄坐喺梳化密斟嘅議員張文光透露，原來班官深知議員已甚少蒲前廳，於是依家識得把握早上十一點至十二點半呢個半鐘黃金時間，諗住呢段係質詢時間比較齊人，落前廳搵議員打招呼。

點解議員質詢時段會齊人啲呢？張文就分析話，唔少議員可能想跟進質詢，所以會留喺前廳（目及）住會議，以便想講嘢時可以即刻返回議事廳，造就咗呢個時候有比較多議員喺度，難怪一啲平時少見嘅政治助理，近期每到禮拜三朝早都會現身立法會啦，事關拆彈都靠呢個半鐘嘛。