政壇：女議員鬧爆張建宗

依家社會講求男女平等，唔少女士唔單止能夠撐起半邊天，撐起整片天都綽綽有餘，有時只係欠缺一個機會。立法會議員劉慧卿尋日喺立法會提出質詢，關注政府啲諮詢組織或法定團體女性參與度不足嘅問題，點知勞工及福利局局長張建宗開口夾着脷。

對於近四百個政府諮詢或法定組織中，有近百五個唔合格，女性非官方成員比例唔夠三成，卿姐火都嚟埋，大鬧女性權益根本唔係福利，有乜理由要張建宗代勞？擺到明要硬食嘅張建宗死死地氣咁話，其實當局都好重視問題，一有呢類組織成員任期滿，就會盡量做到達標，當然亦要用人唯才啦。跟住佢講講吓，無啦啦話依家有五成四入大學嘅係女仔，就連僱員再培訓局都有七成五係女學生，證明當局有做嘢。

一講完即刻畀卿姐鬧爆，喪鬧張建宗「讀大學關你咩事呀？」教育界議員張文光幫口鬧，話有成三十五個法定組織零女性參與，擺到明政府自己都重男輕女啦！就好似十八個區議會中，有十四個嘅女性委任區議員少於三成，有八個更加係零女性添，呢啲跨部門嘅嘢，身為政務司司長嘅林公公應該出嚟講吓啦。

林公公見死不救

勞聯嘅議員李鳳英亦睇唔過眼，加把口同張建宗講，事實勝於雄辯，咁多法定組織唔合格，政府死口唔認都好，起碼都要改善啦！議員陳淑莊都不甘示弱，索性要求張建宗立法列明法定組織至少有三成係女性。

一子錯滿盤皆落索，面對議員連珠炮發，林公公竟然坐喺度見死不救，張建宗就一味重申政府既要用人唯才，亦會有探討空間改善問題，至於立法就免嘞，總之會提醒各局各部門，法定組織成員任期滿時，要想辦法做番達標。