港鐵事故日日有 官僚麻木是禍首

「唔好意思，當年阻住你！」太一叮認為，港鐵呢句廣告口號應該改成：「唔好意思，今日又又又又又……阻住你！」

冇錯，港鐵尋日又發生故障，仲打孖嚟添。朝早六點，東鐵紅磡站訊號系統故障，令往來上水站嘅行車班次由平時每六分鐘一班延誤至八分鐘。最狼狽嘅係顧得頭嚟又甩髻，訊號系統搶修一小時後回復正常，點知唔夠四粒鐘，又輪到迪士尼線出事。由於路軌轉轍器運作不順，只能維持一架列車來回迪士尼站至欣澳站，班次由五分鐘一班延至九分鐘，服務受影響逾兩小時。

難為港鐵仲自詡效率一流，冇錯，佢哋申請加價又快又密，效率之高的確係無出其右，但講到服務咯喎，真係不敢恭維。一個早上兩宗事故，乘客受阻被玩殘，固之然怨聲載道，迪士尼線係遊客前往樂園嘅主要交通工具，成日唔係訊號出錯，就係轉轍器有問題，港鐵出醜事小，影響香港形象事大吖！

話時話，港鐵出事故都唔係新聞咯，市民聽都聽到麻木晒。上個月立法會踢爆，單單喺七月至九月，港鐵列車服務延誤八分鐘或以上嘅事故就多達八十六宗，即係幾乎幾日一宗。列車事故無日無之，搞到好似服務承諾一部分咁，計太一叮話齋，港鐵應該將「唔好意思」四個大字印成巨型海報，貼喺每個車站月台就啱嘞，實用得着㗎，叮！

最弊嘅係，港鐵發生事故，餐餐淨係識講對唔住，批評接受，態度照舊，啱啱至喺立法會誓神劈願承諾改善，輿論壓力一過即刻故態復萌。可能港鐵管理層認為機件失靈係小事，員工失魂係小問題啩，所以得過且過，闊佬懶理咯。如果唔係，點會啱啱被人省到面懵懵，轉過頭又事故頻仍？

嗱，太一叮提醒港鐵，千祈唔好有呢種賴皮心態，唔係隨時死得人多。須知道，積小成大，呢度一個小故障，嗰度一個小疏忽，積積埋埋隨時變計時炸彈。花園街排檔火災死傷枕藉，禍因就係官僚部門對所謂嘅小問題輕率大意。排檔擺過界？小事啫；貨物堆積如山？好閒啫；用易燃尼龍布鋪搭上蓋？無問題吖。終於一把火就釀成奇災巨禍，當局事後先至嚟補救，一切已經太遲咯。

一句講晒，港鐵事故多多，市民可以睇到麻木，港鐵高層及特區政府就絕對唔可以麻木，仲唔認真查找不足，作出改善，遲早車毀人亡都有之，叮！