政壇：美領事爆煲呔曾亂邀功

就快執包袱嘅煲呔曾成日都想攞威邀功，上月去夏威夷開亞太經合組織高峰會，同美國國務卿希拉妮會面後，佢大鑼大鼓咁話為持特區護照嘅港人爭取去美國時可以唔使簽證，仲話希拉妮反應正面，副成功爭取嘅樣令人印象深刻。不過，呢個謊言尋日被美國駐港總領事楊甦棣踢爆，原來美國暫時冇諗住畀特區護照免簽證待遇喎！

美國依家暫時只畀三十六個國家嘅護照持有人享有免簽證待遇，新加坡、南韓都係免簽證計劃成員，台灣同美國已傾到「積極樂觀」嘅地步，至於煲呔曾口中希拉妮「反應正面」，可能代表十畫都未有一撇。美國駐港總領事楊甦棣尋日話，佢都好想香港人去美國可以方便啲，但目前嘅免簽證申請都仲未消化得晒，所以暫時應該唔會接受新嘅地區做免簽證計劃候選。

至於本港特首選舉，楊甦棣就話好認同港澳辦主任王光亞所講，特首人選唔單止要愛國，民意認受亦都好重要。