政壇：釋智慧悔建天壇大佛

出家人喜清淨，寶蓮禪寺住持釋智慧大師尋日出席天壇大佛開光周年紀念暨籌建萬佛寶殿水陸息災法會時，卻對寶蓮禪寺嘅環境一再感嘆。佢話自從天壇大佛同昂坪360纜車相繼落成後，遊人足迹愈嚟愈多，寶蓮禪寺嘅清淨環境不及以前，甚至遊客消費模式亦改變。講講吓，釋智慧甚至自我檢討，質疑當初興建天壇大佛係佢嘅錯！

釋智慧點解會咁諗？聽佢嘅解釋，主要有兩點，一係遊人多，禪寺環境不再清淨，阻撓出家人清修；二係昂坪360起好之後，啲遊客集中喺昂坪市集消費，令到寺院同附近村民嘅收入減少咗，釋智慧自悔當年有份擬議興建天壇大佛，話中雖然流露濃濃嘅「冇得返轉頭」嘅遺憾，但好多人會從另一邊去諗，譬如香港嘅整體旅遊得益、相關計劃對推廣佛教嘅作用等等。

釋智慧禪悟了得，政治手腕亦高超，或者佢係想提醒寺方已為社會付出咗好多，家吓寶蓮禪寺正同政府磋商寺內擺放骨灰一事，尋日嘅禪語係咪另有所指呢？