政壇：沉淪不離三兄弟

區議會選舉之後，政黨同政團互動頻頻，喺區選中大敗嘅人民力量、社民連同公文袋尋日再捱重錘，事關港大民意研究計劃喺區選後首次進行嘅民調結果顯示，人民力量同社民連嘅民意評分不約而同少於三十，跌入可憐嘅界線之下；公文袋得分雖然多過四十，但亦同社民連一齊創下調查以來最低分紀錄，三黨負責人黃毓民、陶君行、袋巾傑都面對黨內外尖銳批評同壓力，驟眼睇真係十足港版「作死不離三兄弟」噃！

泛民多個黨派區選後動作多多，近期攜手搞咗個有關特首選舉嘅初選機制，仲落實早前宣稱嘅割席策略，唔預激進政團，同主流泛民漸行漸遠嘅人民力量同社民連選後愈見消沉，尋日公布嘅民調更顯示，區選之後，兩黨嘅市民支持度都劇跌六分以上，人民力量只得二十八點三分，社民連更只有二十五點八分，兩者得分距離合格都太遙遠。

同樣創支持度評分新低嘅仲有同樣喺區選中敗北嘅公文袋，得分只有四十四點四分，創同一調查以來最低紀錄。其他要小心嘅政黨仲有新民黨，佢哋嘅支持度評分雖然有四十九點八，但衰認知度不足，即好多市民唔識佢哋。

張國柱孤注一擲入工黨

講完十大政團執位後，又講吓立法會新變動，由泛民主派籌組嘅工黨十八號就成立，我哋聽到原屬民協嘅社福界立法會議員張國柱將會出任工黨紀律委員會主席，為免雙重身份，佢會退出民協，令民協又少咗個創會會員。按目前安排，李卓人坐定粒六做工黨主席，前公文袋成員張超雄同公民起動何秀蘭就會做副主席。不過，工黨拉唔到街工埋堆，阿人又輸咗區議會選舉，工黨頭威欠奉，阿柱棄民協入工黨，都可以話係孤注一擲。