學券制度弊端多 幼園免費莫再拖

財政司司長曾俊華年年估錯庫房收支，「估錯王」稱號當之無愧，嗱，今年隨時又扭虧為盈相差幾百億銀。有時真係唔到你唔質疑，財爺小時候係咪餐餐數學考試零雞蛋？

即係咁，鬍鬚曾對財政胡算、瞎算，太一叮思疑佢喺小學雞年代冇打好數學基礎，所以天馬行空亂咁估。一來俗語有話，三歲定八十，幼兒教育嘅重要性不言而喻；二來咯喎，香港幼稚園由始至終被摒諸免費教育嘅大門之外，唔係人人有機會讀好書。

各位咁聰明，一定知道太一叮兜咁大個圈，梗係唔係關心港府高官有冇讀過幼稚園啦，雖則搵個數盲官員做大掌櫃，的確好鬼得人驚。但有個問題一樣有迫切性，就係落實十五年免費教育，將一條龍免費教育擴至幼稚園。呢嗱，教育界又出嚟示威嘞。

教協、教聯同十幾個教育團體喺立法會門外集會，近二千名教師、家長同學童出席，爭取十五年免費教育。團體代表批評，港府以為學券制等同全面資助，但新制實施四年，事與願違，弊端多多，單單不設薪級表已經令人氣餒，幼師加薪無望，唔係士氣低落，就係無奈轉行，已經足以拖垮整體教學質素。集會團體要港府盡快落實十五年免費教育，全面資助改善教學環境。

大家聽到啦，十五年免費教育被束之高閣，幼兒教學質素就有被拖垮嘅危機，未來主人翁輸在起跑線上，香港競爭力係咪岌岌可危先？如果教出嚟嘅高官個個都係數盲小學雞，納稅人副身家咪遲早被敗清光？

話時話，推行十五年免費教育嘅開支，比學券制只係多六至十億銀，對坐擁金山銀山嘅港府嚟講，只係九牛一毛啫，有乜好畏首畏尾呢？定係夕陽政府懶得就懶吖？喂，學界透露，學券制實施短短幾年間，已有近百間幼稚園被迫走上執笠之路，再拖落去，最驚學生冇書讀咋！

教育係國之根本，而十五年免費教育就係政策之本，咪話澳門同台灣喺呢方面比香港行快一步，就連國內窮鄉陝西寧陝縣最近亦實現呢個樹人大計。教育局局長孫明揚，你唔好話畀太一叮聽，港府對教育嘅承擔竟然連一個山區貧困縣都不如呀，叮！