政壇：剷除黎廣德 何鍾泰公私兩利

富貴黨喺區議會山頂選區贏後好矚目，其實另一個值得留意嘅係南區港灣選區，因為唔講唔知，原來喺淺水灣、深水灣等一帶住咗好多工程師，而立法會工程界代表何鍾泰就盡晒力，為富貴黨嘅馮仕耕拉攏工程師支持，結果係令空降嘅公文袋嘅黎廣德僅取得三百多票，大敗而回。

其實何鍾泰前仆後繼幫富貴黨，在公在私都百利而無一害，既可以賣個順水人情畀富貴黨，又可以挫一挫黎廣德嘅銳氣，免除黎乘機聚集支持者強勢回歸工程界，挑戰佢喺立法會嘅議席。

但有業界中人語重心長話，何鍾泰除咗要留意黎廣德呢個工程界死敵外，仲要留意由工程師學會核心人物另起爐灶成立嘅「工程匯」，因為據聞佢哋一早睇準唔少業界中人，心中不滿何鍾泰長期霸住立法會個位，所以都心思思諗緊係咪搵人挑戰「抽佢後腿」。究竟面對內外夾擊嘅佢，最後點樣見招拆招，化險為夷，大家就要拭目以待喇！