政壇：鬍鬚曾金磚攞威唔知醜

仲有兩個月就會公布新一份財政預算案，陸續有會計師樓篤爆財爺鬍鬚曾再次計錯數，單係上半年嘅賣地收入為例，已超過政府年初嘅預期，財赤又再變為庫房水浸，但對於以上種種計錯數嘅指摘，鬍鬚曾一於好少理，只係顧住向自己面上貼金。

自誇外訪帶挈港出口

鬍鬚曾尋日喺個人網誌話，刊出呢篇網誌時，佢已經去屬於「金磚五國」之一嘅南非。佢話自從○七年做咗財爺後，就先後訪問過「金磚」中嘅巴西、印度、俄羅斯，自誇咁話每次去完，香港嘅出口額都會增加，真係頂佢唔順！佢話好似佢○八年去印度訪問，○九年本港向印度出口額就增長咗五成；而佢一○年去完俄羅斯之後，香港對俄羅斯嘅出口額仲翻咗一番，增加咗一倍多添！

跟住佢又話，受到歐美金融危機影響，佢哋要有「新思維」嘅同時，亦都唔可以忽視「金磚五國」之中嘅中國，事關中央已經明確表示會對香港擴大服務貿易開放！

老實講，由佢上場到依家，年年估錯數，明明庫房水浸，但仲係扮「狼來了」，堅持做好「守財奴」份工，唔肯開倉派米，仲講乜嘢新思維，根本係抱殘守缺。佢又話，雖然香港嘅對外出口貨量喺第三季下跌咗百分之二點二，而九、十月嘅合計出口貨量亦可能會有百分之四嘅跌幅，但唔緊要，因為佢有預感，今次去完南非後，香港對南非嘅出口應該都會升！

講真，若果鬍鬚曾認為單靠佢出去打個白鴿轉，出口額就會增加咁神奇嘅話，咁佢真係太天真。與其自吹自擂，佢倒不如認真反省吓，好好咁做埋剩低嗰七個月任期喇！