食肆摘星固可喜 美食天堂多隱憂

法國飲食聖經《米芝蓮指南》三年前登陸港澳，隨即掀起摘星熱潮，香港人從此見到「白色車胎人」標誌，諗起嘅唔再係車房，而係星級食肆。

嗱，香港今年又有六十幾間食肆摘星嘞，其中唔少係新上榜，四間獲評為頂級三星，包括全球首間喺意大利以外獲此殊榮嘅意大利餐廳。更令老饕雀躍嘅係，除咗富豪飯堂之外，獲推介嘅平民餐廳愈來愈多，遍布尋常巷陌，豐儉由人，任君選擇。

香港人出名識飲識食，米芝蓮指南總監係咁講嘅：過去四年香港嘅食肆水準不斷進步，食品種類及水平幾乎超越紐約。大家估唔到呢，中國大躍進年代嘅超英趕美之夢，今日終於由香港特區圓咗一半，犀利啩！

民以食為天，香港食肆星光熠熠，本來係好事，證明美食天堂並非浪得虛名。但正如古人話齋，「樂既樂矣，憂亦隨之」，對星級食肆嚟講，獲得洋人肯定固然可喜可賀，不過咁，最開心嘅通常唔係食肆老闆，而係舖位業主，事關又有得加租嘞！

人怕出名豬怕肥，事實證明，唔少食肆摘星之後，都被業主飛擒大咬瘋狂加租，幅度仲隨時以倍計添。所以話，今時今日，摘星背後，笑中有淚，都唔知究竟係好事定壞事。

講開又講，業主加租獅子開大口，受害嘅又何止星級食肆，成個飲食業都飽受煎熬。最近之嘛，銅鑼灣有間曾獲米芝蓮推介嘅食肆，因頂唔順業主瘋狂加租三倍而結業，東主有感而發咁話，聽聞同區有間雲吞麵舖加到一百五十萬蚊月租，每日賣幾千碗都唔掂啦！

星級食肆尚且叫苦連天，其他小本食店嘅處境更加可想而知，再咁落去，莫講話飲食業捱寒冬，各行各業都會被貴租拖垮。通脹本已如狼似虎，租金再狂升，港人憂上加憂，要擺脫困局，唔通人人要回到那些年，齊齊踎街邊食大牌檔？不過咁，排檔都唔穩陣，隨時一場火災就死得人多！

歸根究柢，租金失控，食肆難捱，都係港府一手造成，土地及房屋政策失敗，搞到地價樓價飆升，香港競爭力不斷下降。依家先至話研究填海增加土地喎，咪又係畫餅充飢，填得嚟蛇都死啦！

古語有話，食君之祿，擔君之憂，港府高官受納稅人供養，好心做好呢份工，認真解決高樓價、高租金問題，如果唔係，你哋一個二個都有星攞，係被市民兜巴星吖，叮！