政壇：工黨選主席 阿人坐定粒六
立法會內幾名基層路線議員走埋一齊，本月十八號就會成立工黨，到時會選舉主席、通過黨章等。新黨由邊個揸Fit？截至尋日，據講只得職工盟立法會議員李卓人報名做主席，睇嚟阿人都做硬主席咁滯。區選中敗於工聯會小花劉桂容嘅阿人，啱啱嘗過爭而不得嘅痛苦，今次唔使爭就有得做主席，真係飲得杯落！
阿人尋日透露，工黨嘅成立典禮遲啲先搞，十八號嗰日，佢哋要處理唔少程序，到時主席之位會以一人一票方式選出，三位副主席、司庫及秘書長，則由二十一名執委互選。雖然暫時得阿人報名選主席，但都要投信任票決定，但阿人應該坐定粒六㗎喇！
據講新工黨會有團體會員，包括物業管理工會、新巴工會、九巴工會及公民起動等，新巴工會仲好慷慨，以友情價租出部分地方畀工黨落腳。
（設計圖片及對白）