政壇：高永文鍾情春餅老鵝

潮州商會尋日喺遮打花園舉行潮汕文化嘉年華，活動係商會九十周年嘅重頭戲，為咗令大家品嘗最正宗嘅潮菜，商會會董專程親赴潮汕，尋找最出色嘅食肆邀佢哋來港參加嘉年華。潮州商會會長陳幼南至愛「老鵝」，即係飼養超過兩年嘅獅頭鵝滷製而成，因為本地潮菜館好少見，骨科名醫高永文都對老鵝大感興趣。

高永文仲推介一款名為「春餅」嘅潮州小食，而會董張俊勇同副會長胡劍江就喜愛甜絲絲嘅芋泥餅。保良局總理鄭錦鐘認為嘉年華機會難逢，喺場內狂掃十多包魚蛋同韭菜餅，仲買多隻滷水鵝返屋企加餸添。今次嘉年華集中潮汕飲食嘅精華，唔試吓就走寶喇。

永遠名譽會長莊學山話，香港嘅潮州菜有本地化嘅危機，因為部分本地潮菜館多數提供蒸魚菜式，但其實浸魚先至係傳統嘅潮州烹調方法。至於極具潮汕特色嘅風乾魚，亦因輔以機器炮製而失去天然冬風吹乾嘅味道，由於潮州傳統飲食有式微趨勢，故此有必要宣揚潮汕文化。