輻射威脅未解除 港人切勿太天真

有人曾批評香港人既Simple又Naive，其實都唔係完全冇道理o架， 嗱，港人又太天真喇，不過今次同政治無關，唔係亂噏嘢禍從口出，而係亂食嘢病從口入，隨時中招。

日本今年三月發生強烈地震引發核災難，輻射數字居高不下，港人聞核色變望而卻步，去日本旅遊人數驟減。但到咗今日，唔少人對核輻射威脅放鬆警惕，又心郁郁想去日本玩。旅行社近排紛紛復辦日本遊，其中離核輻射災區較遠嘅北海道、關西同九州等地，報團人數更不斷上升。

話時話嘞，如果核災難真係受到控制，只要遠離災區，風險的確有限。弊在核輻射威脅依然存在，早排福島核電站有留守人員要緊急送院，極可能同輻射有關，而核電站反應堆更驚傳有核裂變嘅危險添。呢，《美國國家科學院院刊》發表報告推測，北海道銫137含量由零至二百五十貝可，東京銫含量更介乎一百至二百五十貝可，係旅遊城市之中最高。事實證明，日本核危機唔單止未解除，可能仲繼續惡化緊添。

最可怕就係，核洩漏令到日本海、陸、空全方位被放射性物質污染，造成生態大災難。日本當局陸續發現魚類、貝類、綠茶、草藥、大米、牛肉、茶葉、蔬菜、木耳同蘑菇等含有放射性物質，連小童尿液甚至日本潮服嘅原材料都被驗出受到核污染。輻射食品隨時可能流入本港，如果去日本旅遊，中招機會更大，問你怕未！

正如醫學界人士話齋，就算部分受污染食品嘅輻射含量無超標，亦會對孕婦同小童健康構成威脅。係，日本當局係就係不斷為本地食品做抽樣檢查，但外界一直質疑日本隱瞞咗唔少潛在輻射危機。

唔係講笑，連北海道海產都驗出含輻射，好明顯，核輻射物質大量流入海洋，已經影響咗整條食物鏈。本港學者提醒，市民唔能夠低估核污染嘅嚴重程度：「如果以為幾個月以後就已經安全係好天真。」冇錯嘞，寧可信其有，不可信其冇，無謂搵自己健康嚟開玩笑。

民以食為天，食以安為先。好多人對日式食品情有獨鍾，但計太一叮話齋，食得開心，更要食得安心，為自己安全着想，都係忍下口好啲，千祈唔好太天真呀。再講喇，天涯何處無芳草，唔係一定要食日本嘢嘅啫，係咪！