政壇：選舉前搞論壇 會計師公會惹非議

選委選舉如火如荼，會計師公會本來喺聽日搞咗個論壇，規模仲好大添，不過呢個大騷卻可能叫停，業界中人仲記起早前譚香文單案件，佢因為年前喺立法會選舉前為會計界人士搞講座，搞到被人告佢涉嫌賄選，最終雖獲判無罪，但畀廉署查都夠晒煩喇。譚香文踩咗落氹，會計界嘅人仲唔識小心？

會計師公會遲啲會改選理事會理事，所以早前破天荒諗住搞個理事會改選論壇，邀請公會約二萬五千個會員出席，等佢哋可以聽吓候選人嘅政綱。但係論壇嘅主席，同埋超過一半嘅理事候選人，好巧合地都係今屆嘅特首選委會計界選委候選人，而出席論壇嘅會員亦都係選委嘅投票人，有會計界選委候選人就質疑安排偏頗個別選委候選人。

選管會話會計師公會嘅做法值得商榷，應避免搞啲會令個別候選人有利嘅活動，咁多疑慮下，聽講公會都考慮緊延期，其實特首選委喺十日後就投票，會計師公會等多幾日先搞論壇安全啲。