新民黨副主席史泰祖被踢爆佢喺上水嘅二萬三千平方呎園林別墅天倫小築涉霸佔官地，並且違規改建別墅後，地政總署限令糾正違規建築嘅期限尋日屆滿。史泰祖話，工人尋日已展開清拆大行動，違規興建嘅泳池亦會填平改作種植地，佔用嘅官地亦會歸還政府。
我哋尋日去天倫小築，見到史泰祖啱啱同工人傾緊工程應點做，工程預計需約十日。史泰祖話，天倫小築二萬三千平方呎用地中，一萬六千平方呎嘅私家地會保留嚟做園藝，其餘七千呎官地會歸還政府。地政總署發言人就話，會就實際情況，再決定下一步行動。
史泰祖嘅天倫小築，有七千呎要歸還政府。
相中所見間屋全部要拆。
