政壇：何鍾泰傷指保安累事
立法會工程界議員何鍾泰（Raymond）尋日做咗傷兵，只見佢隻手包住好厚嘅紗布，原來早前返去舊大樓泊車時，同駐守嘅保安發生爭執，整傷咗隻手指，搞到要到醫院包紮同食抗生素。
添馬艦立法會新大樓入伙後，中環立法會舊大樓由政府外判保安正式接管，不過大樓依舊，人面卻全非，雖然舊大樓預咗五個車位畀班立法會議員泊車，但自十一月初，大樓交番畀司法機構後，政府聘請外判保安接手工作，據聞當中有幾個保安特別聲大夾惡，又未必識啲議員，激到班議員紮紮跳。
Raymond星期一返舊大樓諗住泊車遭拒，同外判保安理論期間，關車門時夾親自己手指，當場血流如注。
何鍾泰因為去立法會舊大樓泊車，搞到隻手指包到隻糉咁。