政壇：立會叫停議員表決

添馬艦新政府總部趕工入伙，之前已傳出塌天花、手尾未清嘅事，尋日立法會開大會，會議廳竟然爆出入伙以來最嚴重笑話，搞到議員表決條例時，因為計時器冇停、表決鐘響足五分鐘後都投唔到票，最後立法會大會都要暫停，等職員重新啟動電腦先再開會。立法會秘書長吳文華（Pauline）澄清系統完全冇問題，只係人為錯誤喎。不過，議員連番狠批，有人更話做咗十幾廿年議員都未見過，Pauline呢句「冇問題」睇嚟冇人信！

甩甩漏漏 豆腐膶工程

尋日搭正十一點開會時，會議廳都唔夠法定嘅三十人，秘書處響鐘幾分鐘召集，先見班議員徐徐搭升降機返落嚟開會，原來成班議員「蛇王」匿晒喺樓上嘅辦公室休息。到咗議員就《2011年證券及期貨（專業投資者）（修訂）規則》修訂表決時，倒數鐘竟然失靈，本來只係響五分鐘，點知響咗七、八分鐘仲未停，班議員你眼望我眼，投票不果，會議最後都要嗌cut。

之後班議員臨時放風，出晒會議廳吹水，不過一講起呢單投唔到票事件，唔少人都好激氣，白鴿黨張文光話，做咗十幾廿年議員，都未試過有呢啲情況，希望秘書處好好檢討。工聯會王國興就話，新大樓成日都甩甩漏漏，求其都搵到兩、三處地方有錯，真係失禮死人。同屬工聯會嘅黃國健就話：「新大樓真係豆腐膶工程，今次真係唔搬好過搬。」

Pauline梗係即刻走出嚟撲火，話今次只係人為錯誤，因為係新同事負責響鐘，下次唔會再出現喎。不過，呢啲死撐言論搵邊個信呀﹖

講開立法會，尋日佢哋嘅紀念品店開幕，水晶立法會模型賣三百蚊，一條印有立法會字樣嘅茄士咩頸巾，三百五十蚊就有交易。