僭建炸彈爆大鑊 港府縱容惹災禍

人哋話鄉下人迷信，諗唔到新界鄉紳抗議港府拆村屋僭建物，竟然出到打齋燒香咁誇張。火燒「發展局局長林鄭月娥」紙紮公仔，詛咒林局長快啲死，再送一個「林門鄭氏」紙棺材，夠晒恐怖！

新界人喊打喊殺，更激更惹火嘅抗爭行動一觸即發，港府未拆僭建，先要拆彈。係人都知，曾蔭權係一個迷信風水嘅天主教徒，可能佢睇完村民燒香唸咒，覺得心虛膽怯啩，於是批評鄉紳，話阻撓政府依法辦事，只會引起市民反感。林鄭為免「好打得」招牌從此被拆，亦出嚟反擊村民，重申唔會特赦違規村屋。

村民搞激進抗爭，固然值得商榷，但新界僭建物遍地開花，煲呔曾咁多年來隻眼開隻眼閉，一直唔出聲，依家計時炸彈爆發，先至裝模作樣講一堆無關痛癢嘅廢話，最令市民反感嘅人應該係佢至啱！僭建村屋漫山遍野，港府得過且過疏於執法，長期冇人跟進，港府又有依法辦事咩？

事實上，村屋僭建問題積重難返，炸彈愈爆愈大鑊，歸根究柢就係港府長期有法不依、執法不嚴種下嘅惡果。嗱嗱嗱，唔止太一叮咁講㗎，申訴專員多次發炮，狠批港府一面嚴打市區僭建，一面悄悄放生新界村屋，暗搞「一法兩制」，卒之搞到成個新界變咗僭建特區咁。村屋居民享受慣無王管嘅「高度自治」，港府今日迫於民情，先至話強行拆屋，班鄉紳唔拆你祠堂至奇！

仲有呀，禮賓府主人對村屋僭建姑息養奸，特首參選人唐英年更加煽風點火，為咗討好班鄉事選委，竟然亂開政治期票，倡議將三層丁屋放寬至最多九層，搞到班鄉紳鬼咁亢奮，於是反彈力度咪更加大囉。喂，村屋僭建問題必須解決，呢個幾乎係社會共識，唐唐唔識獻言建策，反而添煩添亂，呢鋪想唔認「豬」都唔得啦！

講開又講，煲呔曾嘅「曾氏祖屋」都被揭違規僭建，對屋宇署嘅清拆勸喻令更加拖得就拖。如果村民學煲呔曾，狡辯「直覺認為」村屋僭建冇問題，港府咪啞口無言？

一句講晒，僭建炸彈爆大鑊，港府縱容惹災禍。法律面前人人平等，既然僭建違規，執法就應該一視同仁，冇人可以超乎法律之外。咪話太一叮唔提醒，港府快快收拾爛攤子，如果唔係，香港嗰塊法治招牌睇怕都好難保得住，叮！