Sun世代：古玩世家傳人跳出悶局

一般人以為喜歡古玩的收藏家，都是拿着放大鏡的「老古董」模樣。但黑國強（Andy）卻給人年輕、有活力、敢於創新的感覺。臉帶稚氣的他，原來已有逾二十年鑽研古玩的經驗。貴為古玩業第二代，自細並不鍾愛古玩，他因懶惰誤闖入行，怕悶自立門戶，並創辦香港國際古玩及藝術品博覽會，目的是希望改變現代人對古玩的態度。

Andy的爸爸黑洪祿，是香港著名中國明、清古典家具收藏家及古玩家，外公也從事古玩買賣，耳濡目染下，他自小已接觸古玩，但兒時並不愛古玩：「細個時無特別感覺，只係知全屋都係呢啲傢俬，因為啲傢俬好硬，仲成日撞到周身瘀！」

不愛古玩，卻與古玩為伍，由中六離開校園，一轉眼已超過二十個年頭，深究原因，原來是一個「懶」字：「我自知唔係讀書嘅材料，讀完中六就去咗爸爸嘅舖頭打工，初時諗住易做！」在古玩店做學師仔，凡事由低做起，清潔、拆貨、裝嵌、搬運樣樣做齊，漸漸他開始產生興趣，於是看書鑽研歷史故事與古玩的關係。

下鄉闖豬欄尋寶

在店舖三年，Andy開始跟爸爸走遍大江南北買貨，下鄉尋寶的經驗令他至今難忘，「以前通訊唔發達，要自己上山下鄉搵貨，我踏遍農村，有時連豬欄、雞棚都闖過！」

古玩寶物可遇不可求，Andy也交過不少學費：「我試過用幾十萬買咗件貨，但卻賣唔出！」估錯價激起他了解古玩的動力，九二年他到紐約擔任美國著名古玩鑑賞及收藏家安思遠的助理，「我當佢係恩師同契爺，佢帶我參加國際古玩博覽會，嗰次經驗令我嘆為觀止！」

九九年，怕悶的Andy自立門戶，開設「研木得益」。走進他的古玩店，沒有那種陰陰沉沉的古舊感覺，反而像置身充滿新穎藝術氣息的現代化畫廊：「創業難，守業難，做到創新更難！我唔想古玩店畀人一種守舊嘅感覺，我要創新。」但○三年沙士，古玩生意出現危機：「當時經濟低迷，幾個月都無人幫襯，以前天跌落嚟都有爸爸頂住，但今次喺心理上好似世界末日一樣，第一次覺得有危機感！」

危機感迫使他反思，決定在港舉辦古玩藝術博覽會，○六年夢想成真，回想這個「親生仔」，他以痛苦來形容：「由籌備、管理、會場、布置都係一手一腳，試過做幾晚通宵！」今年博覽會踏入第七年，但他仍不敢自滿，希望再努力為全球藝術家建立分享平台：「六年間由十七個參展商，到今年嘅一百零二個，雖然成功，但我當博覽會係十年計劃，好多外國人會去紐約倫敦參加國際性古玩博覽，我希望佢哋都可以嚟香港，不過到依家未做到！」

Andy's Profile

現　　職：

香港國際古玩及藝術品博覽會創辦人兼董事、古玩店「研木得益」有限公司店主

婚姻狀況：

已婚、育有一子一女

興　　趣：

收集及鑽研古玩、閱讀歷史書