政壇：周光暉薦傑出董事中三元
一年一度嘅香港董事學會傑出董事獎尋日又揭曉，多個知名人士上榜。同好多其他選舉一樣，要有人提名至可以做候選人，唔講唔知，會計師公會前會長周光暉因此升呢做咗「星爸」。何出此言？原來佢非常「好腳頭」，佢提親邊個，邊個就當選，你話係佢好眼光定係好彩呢？
今屆攞到傑出董事獎嘅，包括莎莎國際主席郭少明、領匯主席蘇兆明同行政總裁王國龍、招商銀行副行長張光華、安東油田董事長羅林同幻音數碼主席廖家俊等。
周光暉都算犀利，今年佢連中三元，提名王國龍、蘇兆明同張光華，三人都成功攞獎，真係冇令佢跌眼鏡，成功當選傑出董事，再加埋佢過往嘅紀錄，「星爸」呢個榮譽真係實至名歸。若果叫佢提名香港小姐，會唔會都掂呢？
周光暉提名三人做董事學會傑出董事獎候選人，結果連中三元。（資料圖片）