政壇：搵周一鑊試一滴香

醫療失誤、食物安全等問題頻生，畀市民鬧爆，究竟政府點解咁多甩漏？特首辦嚟緊禮拜五晚嘅網上節目《時事Q&A》就搵咗「每周一鑊」嘅食物及衞生局局長周一嶽，同網民討論吓點樣改革醫療制度同提升服務質素喎。

之不過，節目都未做，就已經引嚟網民留言問好多問題，有網民大鬧周一鑊醫療衞生冇樣做得好，生時冇床位、死後冇骨灰位，又叫佢快啲諗辦法堵截內地孕婦衝閘，有網民仲話要請周一鑊食「一滴香」。

懶幽默寸爆肥仔張

話說之前我哋報道過，內地有食肆喺火鍋湯底加咗啲可能對身體有害嘅「一滴香」，引起好多人關注。立法會飲食界議員「肥仔張」張宇人上個禮拜就拎住支「一滴香」同周一鑊對質，問佢點樣可以有效防止對身體有害嘅食物添加劑「一滴香」流入香港。

點知周一鑊就大耍官腔，話局方喺市面抽查嘅樣本真係搵唔到有「一滴香」，仲大條道理咁話冇證據顯示「一滴香」嘅主要成分對人體有害，即使動物長期食用都冇不良反應，叫市民唔使擔心，臨尾仲要懶幽默咁話肥仔張拎住嗰支係「一滴香酒」，而唔係「一滴香」，寸佢買錯嘢，激到肥仔張紮紮跳，仲好火滾咁話周一鑊根本唔明市民嘅擔心。

既然周一鑊言之鑿鑿咁話冇證據顯示「一滴香」對人體有害，不如就趁呢個禮拜會跌至十四度，攞埋肥仔張嗰支「一滴香酒」，一邊同網民打邊爐，一邊交流吓醫療改革意見囉，睇吓啲火鍋湯底落完「一滴香」之後，會唔會真係好香，定係一食就會「香」！