財爺懶理民間苦 紓困忌玩狼來了

「鬍鬚曾」曾俊華搞財政預算案年年估錯數，愈錯愈離譜，庫房收支預算同實際盤數往往相差十萬八千里，誤差百幾、幾百億係小兒科，過千億都有之。所以咯喎，鬍鬚曾唔止係「史上最廢」嘅財爺，更加被封為「估錯王」添，咁傳奇嘅港府大掌櫃，係咪後無來者唔敢講，話係前無古人相信都冇乜走雞。

嗱，話口未完，鬍鬚曾又甩鬚嘞，今年預算案咪估計本年度地價收入僅得六百二十億嘅，點知根據地政資料，港府首七個半月已袋咗六百三十億，估計全年地價總收入可能高逾一千億。庫房隨時又由百幾億赤字，變成三百億盈餘，問你服未？

話時話，庫房水浸，但市民嘅荷包就因為通脹飆升而不斷瘦身。官富民窮，港府係咪好應該還富於民呢？哈，鬍鬚曾話喎，外圍經濟因素未明朗，不斷重申要量入為出、應使則使。即係又玩狼來了，一味靠嚇，為明年二月嘅預算案閂定後門。

港府咁疊水，但就諸多藉口，拒絕開倉派米。喂，鬍鬚曾，你咪當市民係羊牯喎！「東方報業民意調查」顯示，三成七受訪者直指經濟困難更應派糖紓困；兩成七狠批鬍鬚曾係守財奴；兩成七直斥佢不知民間疾苦。

嗱，監察組織就講得啱嘞。鬍鬚曾嘅守財奴角色深入民心，市民對佢本來已經冇乜期望，但外圍經濟持續變差，通脹老虎又四出咬人，市民內外交煎，預算案好應該推出中長期紓困措施，協助市民渡過難關。

民心如鏡，民調亦顯示，兩成六受訪者期望預算案加碼紓困；兩成六希望繼續派錢；兩成五盼有減稅或退稅措施。鬍鬚曾咪為預算案做緊諮詢嘅，東方報業民意調查嘅就要小心記低嘞，如果又整份脫離民情嘅更廢預算案出嚟，咁就眼冤咯！

講開派錢，太一叮想畀鬍鬚曾一個溫馨提示。假如閣下唔想再畀人叫守財奴，又或者良心發現，希望卸任前為香港人做番件好事，咁就不妨學吓澳門特首崔世安。人哋梳打埠政府向市民派錢派得幾咁豪氣、幾咁高效，只要鬍鬚曾學到一半，下次派錢唔再搞到天怒人怨，香港人就燒香還神咯！

一句講晒，財爺懶理民間苦，紓困忌玩狼來了。預算案仲有兩個月時間先至發表，希望鬍鬚曾回頭是岸，唔好再做孤寒財主。如果唔係，官富民窮，激發幾十萬人上街，到時就真係狼來了，叮！