政壇：鼠王芬伺機發圍

自從喺替補機制一役中爆出「懲罰選民」論之後，專業會議嘅立法會議員梁美芬隱蔽咗好一段時間，即使前排佢競逐連任九龍城區議會議員，外號「鼠王芬」嘅佢都保持低調，仲絕迹選舉論壇。

區選高票當選重拾自信

鼠王芬喺今屆區議會選舉中高票當選，照計係值得高興嘅事，但尋日佢喺電台節目《給香港的信》大吐苦水，自言喺選舉期間，無論佢本人或者佢做嘅地區工作，都因為遭到對手嘅無情抹黑而慘成犧牲品，例子就係幾年前佢搞嘅旺角滅鼠行動。佢仲話即使佢被對手妖魔化同狠批，但佢仍然深信身為市民嘅代表，理應做到滿足地區需要，哪怕事情有幾細、有幾微不足道，所以唔覺得為咗改善地區衞生去滅鼠有幾蠢。

相信大家都記憶猶新，今年年中替補風波期間，立法會內第一個提出要堵塞漏洞嘅鼠王芬備受批評，替補風波暫告一段落後，佢就銷聲匿迹。區選大勝似乎令佢稍稍重拾自信，難怪尋日佢話喺未來嘅日子，佢會繼續以理性、銘記住地區最佳利益嘅心去服務社區。睇嚟鼠王芬即將重出江湖喎！

話時話，鼠王芬除咗參與過滅鼠行動外，仲牽頭抽查維港水質，並因而得名「抽水芬」。平情而論，呢啲工作冇乜問題，坊間為此而幫佢起花名亦無不敬之意，佢又何必咁上心？依家佢終於諗通咗，將來咪畀心機做囉，使乜介懷人哋為佢改花名呢？