拒借場地即出事
【本報訊】遇襲的打冷店東主昨出院後受訪時現身說法，坦言：「當時四、五個人嚟就大叫『偉哥搵你』，我知道佢係邊個，但我嗰時好忙，咪話要傾就過嚟呢度傾，跟住佢哋撻朵，我即刻話黑社會大晒咩，咁就被佢哋幾個人圍住打啦！」
姓李東主昨表示，其打冷店開業五年以來，從來未收過任何恐嚇勒索，一直相安無事，惟附近有商戶在農曆新年時，曾經被人強行擺花收取三千元陀地。
他又謂，前晚婉拒攝製隊的要求，攝製隊離開後，不知何故來了四名彪形大漢登門，要求他找「偉哥」，結果引發今次事件，令他損失慘重。
姓李東主怒斥，黑漢不僅圍毆他和兒子，甚至連休班警員也不放過，簡直「無法無天」，幸好警方到場拉人。
事發的打冷店在牛池灣非常旺場，每晚吸引不少食客光顧，東主更以大牌檔方式經營，在店外安排枱櫈讓客人坐在露天位置用膳。
打冷店東稱開業五年從來未收過恐嚇勒索。