醫療醜聞爆不停 藥物事故陸續來

本港醫療體系百病叢生，基層市民真係唔敢有病。你知啦，入到公立醫院，被人打錯針、開錯刀、輸錯血固然隨時冇命，就算幫襯私家醫生或者去藥房自己買藥食，一樣係以身犯險嘅高危動作。

呢嗱，一名十三個月大男嬰出水痘，上星期六求診於一位兒科醫生，獲處方一隻藥水，點知服後隨即失去知覺，要送入威爾斯親王醫院深切治療部留醫。好彩男嬰經治療後情況穩定，總算係不幸中之大幸。

點解醫水痘居然醫到入深切治療部？經調查揭發，懷疑醫生開錯藥，處方嘅藥水濃度高咗三倍，問你怕未！

嗱，藥物事故就好似出水痘咁，通常爆開就爆，私家醫生懷疑開錯藥，而藥廠就被踢爆弄虛作假。前年被揭發竄改二百多種藥物有效期嘅萬輝藥業，再被踢爆私自更改兩款咳藥水嘅保質期，市面共四十萬樽咳水即時被飭令回收。

有冇搞錯？保質期係鑑定藥物是否有效嘅指標，竟然可以好似女士填寫三圍數字咁隨意加大縮小，仲有冇兒戲啲吖？醫生亂咁開藥，藥廠亂咁賣藥，究竟衞生署點監管o架？定係見藥物事故爆極都有，已經麻木晒，所以索性放軟手腳不監不管？

話唔可以亂講，藥唔可以亂食，呢個係基本常識嚟o架。係人都知，亂咁食藥，病醫唔好不特止，仲隨時冇咗條命添，絕對唔講得笑。但好可惜，偏偏港府嘅藥物監管極之兒戲，醫生亂開藥已經唔係新聞，問題藥物更加時有所聞，過期藥、無牌藥、唔夠秤藥，真係千奇百怪。最離譜係痛風藥竟然發霉，曾經搞出多條人命添。

咪住先，兩年前藥物事故爆不停，當時食衞局局長周一嶽咪係威係勢成立委員會，話要檢討藥物問題，仲提出幾十項建議添。兩年過去，造假藥廠照樣造假，當局到底檢討咗啲乜？幾十項建議又去咗邊呢？

其實，周一嶽最急須檢討嘅係佢自己，喺佢管理之下，成個醫療系統好似食錯藥咁，醫療醜聞無日無之，藥物事故五花八門，做官做到好似佢咁渾渾噩噩，真係死得人多，叮！