政壇：搞搞政：家廚煮鴨拎鑊 寸爆煲呔曾
煲呔曾民望不斷插水，普遍市民都想盡快送走解決深層次矛盾無方嘅佢，連曾經喺佢做財爺時做佢家廚嘅于燕平都突然回歸贈興，一手拎住鑊同疑似當奴鴨寸爆佢，佢人未走茶已涼嘅悽慘場面，睇怕只會不斷重複上演。
有公關公司尋日發出新聞稿話，一度曾經同政府打官司嘅煲呔曾前家廚于師傅，突然宣布由內地回歸香港大展拳腳，主要係協助資深電視人搞嘅烹飪中心示範菜式喎。于師傅喺新聞稿中不點名寸爆煲呔曾話，自己為咗追求公平待遇而得罪人，搞到自己冇辦法喺香港生活，又特別推介煲呔曾都鍾意食嘅秘製豬手喎。
專登為于師傅獻技而設計嘅嘜頭，就係佢嘅卡通人物圖像一手拎鑊一手拎鴨。至於點解眾多食材只選咗鴨？于師傅就神秘笑笑口叫大家估吓喎。
