政壇：任總獻計撐唐拒做財爺

疑似特首候選人唐唐喺月底宣布參選，呢一連兩日好似唧牙膏咁搵啲財金界重量級人馬高調開腔挺唐，金融管理局前總裁任志剛尋日用三分鐘時間，用咗幾個四字成語讚唐唐，包括「知人善任」、「居安思危」、「迎難而上」等都用齊，講明對於唐唐嘅管治能力同經驗都有信心，並非有人話靠「腳頭好」喎。

不過，任總強調自己只會喺唔影響退休生活嘅情況下為唐唐出謀獻策，表明現時唔打算做全職公職人員，變相粉碎傳聞話佢會成為下任財爺。我哋仲聽聞有多名社會知名人士，好似「公職王」鄭慕智、港區全國人大代表王英偉等，都係唐唐支持者。

至於將於後日宣布參選嘅CY梁振英嘅財金團隊又如何呢？CY話制訂金融政策唔係靠一兩個人，又指香港過去經歷多次外圍經濟造成嘅影響，都係靠機制、金融制度及人才，相信自己亦有相當強嘅經濟金融團隊。佢又話，後日嘅記者會因場地所限，只能夠容納二百人，支持佢嘅市民最好就係留喺屋企睇電視，唔使去會展現場。

CY喺尋日仲正式宣布辭去戴德梁行董事職務，即時生效，至於亞太區主席嘅職務，佢相信需要一兩個月時間交接，希望明年一月正式可以退出。