政壇：預算案引爆工商專聯分裂

由富貴黨、經濟動力、專業會議同黃宜弘組成嘅工商專業聯盟，成立至今都幾個月，一直喺度慢煮，都唔知幾時至煮得熟，總之就未有實質嘢一齊做過。

最近本來有少少起色，十二人約埋一齊見財爺鬍鬚曾就預算案畀意見，聯盟召集人林健鋒仲率先講咗有兩大建議，包括寬免利得稅嘅預繳部分，等班中小企抖吓氣，多啲資金周轉，第二點就係重推中小企信貸保證計劃，就算銀行落雨收遮，中小企都唔使周圍撲水還錢。

林健鋒話明呢個係經濟動力建議，唔代表聯盟諗法，但有富貴黨中人聽到呢個講法就好唔妥，覺得事前講明用工商專聯名義上去見財爺，但林健鋒又周圍同人講經濟動力嘅建議，咁即係算點？富貴黨主席劉健儀承認，本來諗住一齊傾好至發表意見，但如果有人講咗先，真係唔明聯盟有乜用。講到最尾，佢仲嬲嬲哋話，如果經濟動力佢哋咁鍾意講，咁不如分開見啦！