政壇：鄉民怒燒紙紮林鄭

夕陽政府同鄉議局就新界村屋僭建問題各不退讓，據聞由林鄭月娥領導嘅發展局最近耍花招，繞過新界鄉議局向村民派發僭建物申報計劃嘅單張，完全無視鄉議局在事件中的角色。

新界原居民權益最近三番四次遭受夕陽政府漠視，例如申訴專員年初就挑起新界僭建風暴，鄉民即時包圍立法會展示實力，及至九月初同官員召開閉門會議討論僭建問題時，有發展局官員喺席間交代「新界村屋僭建物登記暫緩執法計劃」詳情，由於話不投機即時辣慶多名鄉紳代表離場抗議，有鄉紳更激動咁揚言為保家園不惜「放炸彈」。

僭建風暴玩鋪勁

有鄉紳向我哋爆料話，發展局最近「暗度陳倉」向村民派發僭建物申報計劃嘅單張，圖文並茂邊啲村屋僭建物可透過登記制度暫時保留，另一邊廂相關執法部門又喺落實登記制度前加緊執法工作，根本絲毫冇任何繼續談判嘅喎。

據聞林鄭呢個目中無人嘅做法，已經令主張文鬥武鬥嘅鄉紳主張要大力反撲，頭炮係由二十七鄉事委員會呼籲村民收集所謂嘅僭建物申報計劃單張，並於下周一齊集鄉議局大樓對出大樓空地焚燒相關單張，更準備瞄準事件嘅始作俑者林鄭，屆時將會有人帶備林鄭嘅紙紮公仔上演一幕火燒林鄭。

話時話，一眾鄉紳因涉及新界人傳統權益滿腔怒火，決定終於硬起來同林鄭「玩鋪勁」，正所謂「怨有頭債有主」，除非鄉議局主席劉皇發出手叫停，否則林鄭睇怕真係神仙都難救，準備畀人「火燒後欄」喇！