蟲鼠曱甴奉客 大家點食得落

外敵易擋，內賊難防。啱啱講過日本輻射食物隨時攻陷香港，其實，比起東洋核魔，本地有連鎖快餐店食物頻頻「加料」，對市民健康威脅可能仲大吖。

呢，太一叮所指咪就係醜聞不斷嘅大家樂咯。正如有市民話齋，對呢間連鎖快餐店已經信心大減，會幫襯其他信譽良好嘅食肆。本來，作為大眾食肆，如果食物質素同衞生方面真正做足一百分，生意唔憂冇得做，弊在大家樂一味追求利潤，唔講社會責任，被市民唾棄完全係咎由自取。

記得舊年嘅「飯鐘錢」風波嗎？大家樂喺實施最低工資前諗縮數，剋扣員工「飯鐘錢」，變相減薪，結果自己捉蟲，搞到滿城風雨，千夫所指。工會更發起全城罷食行動，大家樂見眾怒難犯，先至死死氣跪低認衰咋。

年年賺大錢，仲要同員工斤斤計較，大家樂被指「刻薄一百分」不特止，更被懷疑因為要彌補實施最低工資所增加嘅經營成本，不惜犧牲服務質素。呢嗱，佢哋嘅食物「加料」簡直係五花八門，無奇不有，食火鍋送菜蟲、食四寶河送煙蒂、食免治牛肉飯送金屬條、食早餐送透明膠紙等等，駭人聽聞，「令你嘔足一百分」，叮！

而最令人作嘔嘅就係，大家樂經常以曱甴「小強」奉客。無論乜嘢食物，小強隨時出現：火鍋餐芝麻醬、早餐湯底、午膳木瓜排骨花生湯、外賣炒滑蛋雞扒餐，不請自來，死嘅又有，生嘅又有，問你驚未？

食物加料只不過係常餐咋，「好彩」嘅食客仲可以免費欣賞臨時加演嘅餘興節目「鼠之舞」添。呢，幾個月前，有市民喺九龍灣大家樂分店午膳時，有隻拳頭咁大嘅老鼠突然從天而降，跌落佢手腕，嚇到食客爭相走避，場面一片混亂。

叮！一間有多年歷史、相當規模嘅連鎖快餐店，食物接二連三加料，大家樂今鋪真係好大鑊。正如學者宋立功話齋，大家樂衞生方面唔合格，食物品質愈來愈差，管理層必須加強衞生清潔。

有立法會議員更要求食環署密切監察呢類連鎖食肆，加強巡查並檢控多次違規嘅店舖，增加阻嚇力。冇錯喇，大家樂之所以搞出咁多衞生醜聞，皆因當局監管不力。計太一叮話齋，如果懶惰官僚繼續關人個關，遲早爆出「驚足一百分」嘅香港之恥o架，叮！