政壇：夏佳理帶隊澳門腦震盪
雖然港交所主席夏佳理明年四月就要離任，但仍然為港交所出心出力。除咗身體力行，今個月會去西班牙、奧地利「路演」外，明年一月，佢將會率領港交所高級管理層同董事等過大海，到澳門開「集思會」，為港交所未來路向籌謀。
近一、兩年港交所都鍾意跳出辦公室，到工作地點以外嘅地方「腦震盪」，希望「度橋」都醒神啲！唔知今次衝出香港，移師澳門，會唔會有新火花同驚喜呢？
大家都知，港交所二○一○年至一二年戰略計劃都過咗一半有多，港交所未來挑戰有如「一匹布」 咁長咁多，好似面對黑池、另類交易平台、高頻交易、全球交易所整合等等嘅威脅，為咗要更好及長遠規劃，都係時候要好好探討未來策略方向。
港交所主席夏佳理