政壇：搞搞政：林大輝「家臣」不認主

唐唐同CY梁振英將於月底分別宣布參選特首選舉，兩人激鬥進入白熱化，「雙英」陣營中人又再發功。正如唐唐日前話中央冇欽點任何人做特首，又話唔知係咪有唐營同邊啲人係唐營？身為唐唐「家臣」、仲曾經公開挺唐嘅立法會廠商會代表林大輝尋日就死撐，話：「我唔係梁營、唐營，係自己好有型。」

搞完爛gag，佢仲對自己無啦啦硬食曾話中央欽點咗唐唐呢隻死貓而氣憤，佢強調冇講過上述言論。對於唐唐日前同大輝劃清界線，話大輝言論唔代表佢，大輝仲撐番轉頭話唐唐不嬲都好親民、好易溝通嘅。至於表明挺梁嘅立法會會計界議員陳茂波，尋日則暗踩唐唐倡議優化強積金條橋無新意喎！

另外，CY尋日出席園景師周年晚宴後話唔評論自己表現，相信市民自有公論。至於事先張揚二十七號宣布參選，佢話無非因為早就答應大家一選定參選日子就立即公布。講到競選班底有啲乜，就話到時就知。至於唐唐尋日就冇公開活動，只係見佢下午四點幾同競選團隊，急急腳離開灣仔美國萬通大廈競選辦公室。