政壇：袁莎妮逃出緋聞展笑顏
疑似特首候選人唐唐日前首次同傳媒聚會時，公開澄清自己嘅感情缺失「同公職、公職人員無關」。咁啱喺上述講話發表前嘅上晝，被捲入事件嘅香港總商會總裁袁莎妮出席最低工資委員會諮詢會，一見記者就不斷閃避，且全程嬲爆爆，粒聲唔出兼走後門，但尋日佢嘅態度就判若兩人嘞！
話說尋日佢陪同總商會主席胡定旭、常務副主席周松崗等高層到訪立法會新大樓，點知畀記者撞個正着，難免繼續被追訪，唔少總商會中人都好識做，不斷掩護伊人離開。不過，避得一時唔避得一世，記者不斷追問，係咪唐唐已經還咗佢一個清白？袁莎妮依舊不作回應，但起碼笑容可掬，唔再係一副閉翳樣。咁咪好囉，笑吓先至靚女嘛！
袁莎妮（右）參觀立法會時展露燦爛笑容，胡定旭（左）見狀都騎騎笑。