政壇：高永文救災深入敵陣
骨科名醫高永文服務咗紅十字會十七年，尋日獲大會頒發「優異服務榮譽獎章」；至於合和實業主席胡應湘太太胡郭秀萍仲勁，瞓身幫咗三十年，獲頒「三十年服務獎狀」。呢個獎，多少暴露胡太芳齡，難怪佢笑笑口話真係又愛又恨。
身為紅十字會總監嘅高永文話回想最觸目驚心嘅一次救災經歷，係南亞海嘯後直奔重災區斯里蘭卡救災，坐住吉普車由中部直闖東部，走近泰米爾游擊隊重地時，十面埋伏嘅緊張氣氛，真係一步一驚心。四川大地震後，佢又經常往德陽假肢及康復中心治療地震傷者，三年來風雨不改。
同係紅十字會總監嘅胡太話難忘有次去山區探訪災民，睇見對方捧住爛碗，食已發黑嘅蔬菜，心酸到流下眼淚。難得嘅係，當地人從不怨天尤人，令佢好感動。
胡郭秀萍（右）慰問剛安裝義肢嘅地震災民（左）。
高永文（左）喺德陽市嘅醫院探望地震傷者。（紅十字會提供）