政壇：田少焗攻新界東

喺今屆區議會選舉，富貴黨除咗山頂成功復仇外，其他區嘅成績唔算得上標青，新界東更近乎全軍覆沒，本來想明年喺立法會新界東強勢復出嘅榮譽主席田北俊，早排仲諗緊係咪會空降港島，但依家形勢又有變喎！

富貴黨喺前晚召開集思會，據聞，大家都集中講立法會選舉部署，新界東同港島區嘅一班手足，都想田少去佢哋嗰區出選，希望田少勝出後，再下一屆可以騰空位置畀第二梯隊選，延續黨嘅命脈。支持田少去新界東嘅黨員認為，新界東加到九席咁多，田少分分鐘兩萬票就可以當選，但如果空降港島，競爭就大好多，如果喺番新界東出選，到時再加上鄉事派侯志強手握數千票，雖然今次區選用唔着，但喺立法會選舉就點都幫到少少手，所以結論係新界東仍然穩陣得多。

黨員希望莎姐出山

喺咁嘅形勢下，田少極可能焗住留喺新界東出戰，而據聞有黨員希望副主席「莎姐」周梁淑怡再次出山，喺港島嘅名單排第二位，利用莎姐多年來嘅知名度力谷新人上位。至於邊個排第一，由黨內新星陳浩濂擔正出戰嘅機會甚微，反而負責統籌今次港島區選戰嘅區議員邵家輝或有力一戰。

第三個戰區就係九龍西，呢一區雖然有大量高尚住宅區，但富貴黨缺乏戰將發掘票源，所以黨內正考慮調撥其他區做緊嘢嘅後生仔轉戰該區，以清一色年輕人搶佔年輕及中產票，實行刀仔鋸大樹。但選舉呢家嘢，尤其係建制派都好講協調，所以富貴黨係咪可以三區都派人出戰，真係好睇佢哋黨嘅造化嘞！