政壇：搞搞政：蘇錦樑留任 還看競爭法

政府最近喺競爭法草擬褪軚，引嚟唔少批評聲音，好多人都睇住接手硬銷呢條例，至今政績捧蛋嘅商務及經濟發展局局長蘇錦樑（Greg蘇）搞唔搞得掂，被視為自由派智庫嘅獅子山學會對草案都有意見，行政總監王弼（Peter）質疑政府推呢條例只係「人有我有」心態，更懷疑Greg蘇咁落力推條例，唔知係咪為咗喺下屆政府可以繼續留低。

Peter話如果法例通過咗，對大財團嚟講不過係請多兩個律師搞掂佢，但係中小企就好難再團結對抗大財團，甚至分分鐘仲要畀啲大財團告，到時一網打殘啲中小企，益咗嘅又係啲大財團，消費者又係要捱貴嘢喎。何況依家個壟斷局面都係政府一手搞出來，政府唔止保護大財團，最離譜係遲啲條條例仲要對政府公營機構豁免咁話。點都好，蘇錦樑今次都開行火力硬銷，佢由副局長做到家吓，政績數唔到一單，搞掂呢條例，對於佢嚟講可能係下屆有冇位坐嘅重要指標嚟o架。