新任政務司司長林瑞麟尋日首次出席立法會內務委員會特別會議，由於佢孭住署理特首頂帽，梗係安然享受警方保護要人組（G4）貼身保護服務，不過落到立法會開會，其中一名G4卻被人發現坐落貼近官員嘅席位，斜斜地喺林公公後邊保護，唔通林公公以為會畀人掟嘢襲擊，所以要咁貼身安排？
林公公一入場，G4已緊隨其後，坐喺官員席第二排近走廊位置。政府方面解釋因林公公尋日身兼署理特首，所以依例要派G4保護。秘書處就話政府好遲先通知佢哋話有G4在場，因此先臨時決定畀佢坐喺林公公後面。