私隱防線倒退 港府博懵搵笨

有冇搞錯，咁樣博懵法！太一叮咁激動，唔通撞胸色魔又犯案？唔通鹹豬手又作惡？唔係，今次係港府博大霧，令全港市民嘅個人私隱隨時被人剝光豬！

港府點樣博懵呢？件事係咁嘅，上年八達通公司爆出售賣二百萬客戶私隱圖利醜聞，全城嘩然，事件揭露市民嘅私隱防線原來薄如輕紗，隨時被人一眼睇晒。於是咯喎，港府急急補鑊，建議修訂私隱條例，對直銷活動使用及售賣個人資料加強規管嘞。

港府後知後覺，修例搞到裙拉褲甩，本來都夠肉酸咯，但遲到總好過冇到，如果修例能夠堵塞私隱漏洞，或者可以將功補過嘅。哈，點知立法會開始審議草案，議員用顯微鏡一睇，嘩，發現魔鬼在細節中，修例建議根本唔係保障私隱，而係出賣私隱，叮！

草案係咁寫嘅：市民有權拒絕個人資料被商戶轉售或作直銷用途，不過咁，市民要喺三十日內，用商戶提供嘅書面文件發出通知，一旦市民大頭蝦唔記得，或者根本冇收到文件，唔好意思，就當閣下自動同意。咁都得？不問自取是為賊也，商戶濫用或轉售客戶資料，係人都知唔啱啦，按港府嘅邏輯，市民使唔使寫張紙條貼喺門口，敬告賊人拒絕被爆格呀？

呢套不拒絕當同意嘅搵笨修訂，唔止顛倒黑白，運作起上嚟更加係陷阱多多。大家都知啦，香港人為口奔馳，邊學似班高官咁悠閒，可以記住寫乜鬼通知書？最驚嘅係，市民萬一因為搬屋等原因而收唔到通知書，咁咪私隱被出賣咗都懵然不知？到時大量港人私隱被人集體剝光豬，港府就係幫兇！

嗱嗱嗱，私隱專員公署同議員就批評得啱嘞，不拒絕當同意，根本係「博懵式同意」，係私隱防線大倒退。其實，港府掘陷阱畀市民踩，無非想畀商界有機會博大霧，大條道理取得市民個人資料啫。不如咁啦，港府索性將修例範圍擴大至公營機構，政府部門下次再有爆出不慎洩露市民私隱醜聞咯喎，咪有堂皇藉口囉：鬼叫市民冇交拒絕通知書咩？

講開又講，保障市民私隱係政制及內地事務局職責，唔該新任局長譚志源從善如流，修訂搵笨建議，如果閣下做唔到，可能冇乜資格再坐呢個位，勞煩另謀高就。嗱，不拒絕當同意，你唔出嚟反對，就當你同意o架嘞，叮！