玩具大王蔡志明買咗手錶生意後，囝囝蔡加讚就瞓身名錶事業，尋日蔡家一眾又盛裝出席新店開幕禮，加讚透露開店大計，仲話臨近聖誕又要飛去台灣出席另一新店開幕活動，由於太忙打亂咗自己同女友嘅計劃：「我哋都想計劃去吓旅行，但都冇乜時間。」被問到早前有傳二人結婚，加讚就即時否認。
尋日新店開幕儀式完結後，蔡志明同蔡加敏就先行離開，蔡太、加怡同加讚就留守，蔡太解釋：「蔡生趕住開會，加敏就要返屋企睇個女，因為個女發燒，佢好緊張。」
蔡太（左）同加怡齊撐旗下名錶店。
加讚西裝骨骨出席新店開幕儀式。
