行善都要手快有、手慢冇,社會創投慈善基金會轄下嘅社會企業「鑽的」,尋日推出咗一比四十三嘅的士模型,首批模型攞咗五部嚟拍賣,尋日一眾基金會負責人好踴躍撐場。
基金會顧問委員會主席夏佳理攞住部模型左睇右睇,好感興趣,基金顧問陳智思就好實際,即刻踴躍競投首部編號「001」嘅模型,仲大讚手工精美,但佢兩次競投都畀其他嘉賓截胡,好彩本月底仲有八百部模型喺灣仔會展嘅「社會企聯展」公開發售,陳智思仲有機會。
夏佳理(左二)對的士模型好有興趣,可惜陳智思(左一)一部都投唔到。