政壇：譚志源學埋耍太極？
從林瑞麟手上接過政制及內地事務局局長位嘅譚志源，接咗長年未解決嘅燙手山芋，其中一項就係女性團體好關注、有助預防及消除性騷擾惡行嘅《性別歧視條例》修訂，尋日有女性議員質疑，有調查顯示七成二任職喺餐飲業、啤酒推廣、空中小姐甚至美容師嘅受訪女性都話曾經遭受顧客性騷擾，追瘦譚志源點解政府早喺十一年前已經話原則上同意修訂，但拖到家吓都冇動靜？
譚志源左耍右推，話要再研究，適當時候會推進立法工作，好似變身平機會嘅錄音機咁。其實呢個議題拖咗十一年都未解決，孭鑊都應該係林瑞麟，但譚志源做咗局長冇耐，就繼承林公公錄音機作風，真係蕭規曹隨。